رواية موضوع عائلي الفصل الثامن 8 الجزء الثالث بقلم رحاب القاضي

 رواية موضوع عائلي الفصل الثامن 8 الجزء الثالث بقلم رحاب القاضي

#موضوع_عائلي

"بيت الهنا" 

_الحلقه الثامنه 

ــــــــــــــــــــــــــــــ

ليس في الحُبِّ نِصفُ حُبٍّ أبدًا، فليس في الحبيب أبدًا إلا كل الجمال.

- الرافعي.

ــــــــــــــــــــــــ

قرب منها يوسف وكانت متعصب جدا من اهانتها ليه ديماً قدام الناس، ومسكها من دراعها جامد ولفها ليه بشكل عنيف وقال بحده.. 

يوسف 

انتي عايزه توصلي لايه؟.. 

رضوي بغضب 

انت اتجننت ابعد عني وسيب ايدي.. 

يوسف بجمود 

ما فيش واحده شوفتها في حياتي وعملت فيا ربع اللي انتي عملتيه ده، عايزه مني ايه؟.. 

رضوي بنفاذ صبر

اقسم بالله لو ما بعدت عني ل.. 

_قاطع كلامها لما ساب ايدها بس حطها علي ضهرها وقربها ليه جدا بشكل جرئ وقال بعند وتحدي.. 

يوسف 

هتعملي ايه هاتي اخرك.. 

رضوي ببعض خوف وتوتر

كده غلط علي فكره ابعد عني.. 

يوسف بغيظ 

بمزاجي لو عايز اقربك اكتر من كده هعمل، ولو عايز اسيبك هسيبك فبلاش تعملي الشويتين بتوعك دول عليا تاني.. 

رضوي بحده وهي بتحاول تبعده عنها

هعملهم عليك وعلي اللي جابوك يالاااا واتنيل ابعد عني عشان ما افضحكش هنا.. 

يوسف بغيظ

بتغلطي تاني اوكي انتي اللي جبتيه لنفسك.. 

_وبحركه سريعه شالها علي كتفه تحت صدمتها واعتراضها ودخل المبني الخشبي اللي عملينه عشان يقعدو فيه المهندسين وقت الراحه، وراح لاوضه في أخر المبني ونزلها فيها ومسك الباب بايده وقال بغضب.. 

يوسف

الاوضه دي فيها الزباله بتاعت اللوكيشن خليكي فيها بقي شويه لحد ما يجو المهندسين والعمال ويطلعوكي.. 

رضوي بخوف 

الاوضه دي ما فيهاش نور انا مش هينفع اقعد  هنا انا بخاف من الضلمه جداً علي فكره.. 

يوسف بسخريه

يا سكر هو اللي زيك بيخاف ده انتي وليه ما يقدرش عليها غير ربنا.. 

_وجه يقفل الباب فمسكت ايدها هي بسرعه وقالتله بدموع وخوف.. 

رضوي

لا لا العمال لسه مش هيجو دلوقتي وانا بجد بخاف من الضلمه يا بني ادم انت.. 

زقها يوسف جامد لجوه وقال بعصبيه

اوعي بقي.. 

_وقفل الباب واخد عربيته ومشي وما اخدش باله انها اتخبطت في الخشب اللي علي الارض وفقدت الوعي.. 

_وكان سايق عربيته وهو مدايق جدا من تصرفاتها معاه ومن رد فعله العنيف معاها، بس عِنده وغروره منعه يرجعلها، وطلع موبيله وكلم عائشه اللي ردت عليه وقالت.. 

عائشه 

نعم عايز ايه؟.. 

يوسف 

ما تزعليش انا جايبك دلوقتي وهنقضي اليوم كله مع بعض واعملي كل اللي نفسك فيه.. 

عائشه بتوتر

مم مش هينفع بابا اجازه النهارده ما عندوش تصوير وانا مش هينفع اخرج معاك لوحدي ده غير ان عندي شغل مع يزن .. 

يوسف بضيق

من ورااه يا عائشه قوليلو رايحه اشوف صحابي ومش مهم شغل النهارده الشركه مش واقفه عليكي يعني ويلا وتعالي.. 

عائشه 

لا طبعا انت عارف اني مستحيل اكدب علي بابا .. 

يوسف بحده 

خلاص خليكي مرزوعه جنبه انا غلطان ان كلمتك اصلا... 

_وقفل معاها وكلم امير صاحبه اللي رد عليه وقال بصوت نايم... 

امير

ايو يا جوو.. 

يوسف 

انت في بيتك؟.. 

امير

ايوه بس ابويا ومراته هنا.. 

يوسف 

طيب انا في البيت هات هشام وتعالو ونشوف هنخرج نروح فين؟.. 

امير

ايه هي رضوي الشربيني افرجت عنك النهارده ولا ايه؟.. 

اتنهد يوسف بضيق وقال

ما تجبليش سيرتها، واخلص وتعالو مستنيكم.. 

_قفل معاه وخبط بأيده علي دماغه وقال لنفسه بعصبيه وغيظ.. 

يوسف 

اطلعي من دماغي بقي ايه ده... 

_وساق عربيته بسرعه كبيره ورجع البيت ولعداته القديمه من تاني.. 

ــــــــــ #بقلم_الكاتبه_رحاب_القاضي ــــــــ

_وفي شقة سيف كان نايم في اوضته وصحي علي صوت موبيله اللي بيرن، وبص جنبيه علي ريناد بس مالقهاش موجوده.. 

قعد ورد علي موبيله وقال

ايوه يا عبدالله.. 

عبدالله 

فينك؟.. 

سيف

لسه في البيت في حاجه ولا ايه؟.. 

عبدالله 

بص هخلص الموضوع بتاع طارق واجيلك الشركه اشوف الشغل وكده وبعدين همشي مع عمر وانت تبقي تجيب امي ورايا بعد يومين كده تمام.. 

سيف

طيب ما تستني انت شويه وبعدين امشي.. 

عبدالله 

مش هينفع عندي حاجات كتير في البلد عشان الانتخابات، قوم بس انت كده روح الشركه عشان لما اجيلك ما اتأخرش.. 

سيف 

اوكي علي طول اهو، سلام.. 

_طلعت في الوقت ده ريناد من الحمام وهي بتلف الفوطه علي شعرها وقعدت قدامه وقالت بحاجب مرفوع... 

ريناد 

بتكلم مين علي الصبح كده؟.. 

حط الموبيل قدامها وقال

عبدالله واتأكدي بنفسك لو مش مصدقه.. 

ريناد

انا بسأل عادي علي فكره، انت بس اللي سؤالي بقي تقيل عليك... 

سيف 

لا خالص اسألي براحتك انا ما فيش حاجه اخاف منها؟.. 

ريناد 

امممم هي هدومك اللي مش نضيفه فين؟.. 

سيف 

جوه عندك مستني مراتي ترجع البيت وتتكرم عليا وتغسلهم.. 

ريناد 

بس في حاجات كتير ناقصه انا شوفت هدومك كلها ومالقيتهمش.. 

سيف 

ااه ما انا وديتهم مغسله من كام يوم.. 

ريناد بشك 

وديت شويه وسيبت شويه.. 

سيف بحده 

هو في ايه علي الصبح، ما كنا كويسين بالليل والدنيا زي الفل ولا انتي بتصحي متحوله.. 

ريناد بضيق

انت بتغير الموضوع ليه؟.  

قام سيف من قدامها وقال بغضب

ياربي علي القرف، ما قولتلك في المغسله وديت الحاجات المهمه يا ريناد وبكره او النهارده الهدوم هتيجي من المغسله وهتتأكدي بنفسك.. 

ريناد بضيق

هروح اجهزلك الفطار.. 

سيف 

يكون احسن برضو... 

جات تمشي وهو مسك ايدها وقال بهدوء

بحبك.. 

ريناد سحبت ايدها منه وقالت

ابقي كلم مامتك عشان تجيب تيا النهارده.. 

سيف بغيظ. 

البت عند جدتها يا ريناد مش عند حد غريب وانتي ريحي دماغك شويه وافضيلي انا.. 

ريناد

لا انا مش هرتاح وبنتي بعيد عني حتي لو كانت فين، فلو سمحت وانت جاي من الشغل هاتهالي ولو مش هتجيبها قولي من دلوقتي وانا هبقي اروح اجيبها.. 

سيف 

ماشي يا ريناد اللي تشوفيه، وما فيش داعي تجهزي الفطار نفسي اتسدت خلاص.. 

ريناد

براحتك.. 

_وسابته وقعدت قدام المرايا وفضلت تنشف في شعرها وهو اتنهد بضيق من تجاهلها ليه ودخل الحمام، فقامت بسرعه ومسكت موبيله وفضلت تقلب فيه وفي كل المحادثات اللي عليه بس ما لقيتش حاجه فقفلته تاني واتنهدت بضيق ودموع وقالت..

ريناد

انا اكتر واحده اعرفك يا سيف وعارفه ان في واحده غيري في حياتك، وهثبت للكل اني صح ومش هتقدر ترجعني المره دي ولا حد. يغالطني.. 

_تفتكرو بقي سيف بيخونها بجد ولا ايه الحكايه؟.. 

ــــــــــ #بقلم_الكاتبه_رحاب_القاضي ــــــــ

_وفي بيت الاستاذ حسن، نزل طارق من فوق ولقي هنا قاعده علي الكنبه جنب ابوها في مدخل العماره وهي لابسه حجابها وبطلون جينز واسع وبلوزه لونها ابيض واسعه وشكلها شيك وبسيط، فقرب منهم وقال.. 

طارق

صباح الخير.. 

سيد

صباح النور يا ابني، تعالي افطر معانا هنا عامله كيكه حلوه اووي صاحيه من الفجر بتعمل فيها.. 

هنا 

بس علي قدنا انا وانت يا بابا مش عامله كتير.. 

بصلها طارق ببرود وقال

علي العموم شكراً فطرت قبل ما انزل يا هنا، بس قولي يا عم سيد هي السكر هتمشي امتي عشان ابقي اوصلها المحطه؟.. 

هنا 

لا وفر علي نفسك انك تشحت عربية عمك اصل انا قاعده علي قلبكم ومش ماشيه.. 

سيد 

يا بنتي عيب كده، لامؤخذه يا طارق يا ابني هي عفويه حبتين.. 

طارق 

لا عادي يا عم سيد، المهم انا رايح النيابه النهارده ادعيلي.. 

سيد 

ان شاء الله خير اتعشم في ربك خير وهو مش هيخزلك ابداً.. 

طارق

ان شاء الله خير يا عم سيد، افتكرت صح بابا بيقولك ابقي افتح الشقه اللي فوق مننا بالظبط وهويها وفي واحده اسمها بدريه هتيجي تنضفها عشان خالتي ناهد وبنتها هيجو يقعدو فيها النهارده بالليل كده.. 

سيد 

ينورو الدنيا يا ابني وانا علي طول اهو هطلع افتحها واهويها.. 

طارق 

تمام بعد اذنك.. 

ومشي طارق بس وقف اول ما سمع هنا بتقول

بقولك ايه يا بابت هات المفتاح وانا هطلع اعمل اللي قال عليه الواد ده، وانت جهز الورق بتاع التحويل بتاعي عشان ما نتأخرش.. 

سيد

وبعدين بقي احنا اتفقنا انك تقعدي معايا مش تشتغلي معايا.. 

هنا 

شغل ايه بس يا جدع هو ده شغل ده ياريتني ابقي بوابه، علي العموم لما اساعد ابويا مش عيب يلا بقي بسرعه من غير رغي كتير.. 

ضحك سيد بهدوء 

حاضر يا بنتي وامري لله.. 

_ودخل سيد. الاوضه واخدت بالها هي من طارق اللي لسه واقف وبيبصلها بأبتسامه واسعه، فرفعت بوقها بطريقه شعبيه وقالت.. 

هنا 

ما تيجي تاخدلي صوره بالمره.. 

طارق بانتباه 

يخربيت فصلااانك، قفلتيني منك في لحظه.. 

هنا 

يا عم ما تروح تشوف اللي وراك بدل الوقفه دي؟.. 

طارق 

رايح اهو اسكتي بلسانك وصوتك المستفز ده.. 

ــــــــــ #بقلم_الكاتبه_رحاب_القاضي ــــــــ

_وفي بيت الاستاذ حسن.. 

_طلعت روان من اوضتها وهي لابسه بجامة النوم بتاعها، ولابسه فردة شبشب واحده وشعرها شبه منكوش وقالت.. 

روان 

يا ماما فين الشبشب بتاعي.. 

ليلي

ما تشوفيه عندك. يا روان، وافتحي الباب ده اللي بيخبط ده... 

_راحت روان فتحت الباب وهي متعصبه ولقيت عبدالله في وشها وهو في قمة اناقته فقفلت الباب في وشه تاني بأحراج من شكلها الغير منظم بالمره قدامه.. 

ضحك عبدالله بهدوء وقال

افتحي يا روان خلاص بقينا ستر وغطا علي بعض.. 

فتحت جزء صغير من الباب وقالتله بتوتر

ااا انت اللي بتيجي في اوقات مش مناسبه علي فكره.. 

رد عليها بهدوء وقال

انا ماشي دلوقتي اصلا ية ستي بس قولت اجي اسلم عليكي.. 

روان 

الله يسلمك فيك الخير.. 

عبدالله 

بس كده؟!.. 

روان 

ايه يعني اجي اخدك بالحضن؟!.. 

عبدالله بخبث

ياريت تبقي عملتي الواجب بزياده... 

_اتكسفت جداً وجات تقفل الباب تاني في وشه بس منعها لما حط ايده عليه وهو بيضحك بهدوء وقالها... 

عبدالله

انا ما اقصدش اصلا كده انتي اللي قولتي، انا بس عايز رقم موبيلك.. 

روان بقلق

ليه؟.. 

عبدالله

عادي رقم خطيبتي المفروض يبقي عندي.. 

روان 

موبيلي جوه ومش حافظه رقمي.. 

عبدالله 

ادخلي هاتي موبيلك بسيطه اهي، ولا انتي مش عايزاني اخده؟!... 

روان بتوتر

لا عادي دقيقه واحده هجيبه وجايه.. 

‌_وسابته روان ودخلت اوضتها عشان تجيب الفون واول ما شافت شكلها في المرايا شهقت بصدمه وقالت.. 

روان 

مصمم علي ايه تاخد رقم موبيلي، والله ده انت نفسك حلوه يا عبدالله.. 

_وبسرعه لمت شعرها وظبطت هدومها وطلعت لقيته واقف مستنيها وهو بيقلب في موبيله، وقفت قدامه وقالت.. 

روان

خد اكتب رقمك هنا.. 

مسك منها عبدالله الفون وقال

طيب بالراحه ما تذقيش.. 

_وكتب عبدالله رقمه عندها ورن علي نفسه من عندها، وبعدين اداها موبيلها وقال بهدوء.. 

عبدالله 

اول ما هفضي هكلمك اتفقنا.. 

روان بضيق

ان شاء الله؟.. 

اتنهد عبدالله بهدوء وسألها

لتاني مره هسألك يا روان انتي ايه اللي خلاكي توافقي بيا.. 

بصتله روان بتوتر وقالت

انت ليه بتكرره تاني السؤال ده؟.. 

عبدالله بجديه 

فضول ايه اللي خلاكي توافقي بيا وانك تيجي تعيشي معايا في البلد بعد ما كنتي رافضه الموضوع نهائياً.. 

روان بتوتر

عادي يا عبدالله ولو علي البلد ممكن نلاقي حل وسط.. 

عبدالله 

اللي هو أيه؟.. 

روان 

ممكن انا اقعد هنا فترة الدراسه بتاعتي وانت تبقي تيجي كل كام يوم وو.. 

قاطعها عبدالله بجمود وقال

لا يا روان انا متفق مع ابوكي اننا هنتجوز وانتي هتقعدي معايا في البلد، لكن انك تبقي في مكان وانا في مكان تاني ما ينفعش معايا الوضع ده.. 

روان  بضيق 

بس انا صحابي هنا يا عبدالله ومتعوده علي الدراسه هنا.. 

قبل ما يرد عليها عبدالله جه حسن وقال بأبتسامه بسيطه 

تاني يا روان مش اتكلمنا انا وانتي في الموضوع ده قبل كده، تعالي يا عبدالله ادخل نقعد جوه.. 

عبدالله 

معلش يا خالي بس انا مستعجل عشان طارق وعمر مستنيني في النيابه وو.. 

حسن 

معلش بس تعالي نتكلم ونخلص الموضوع ده وبعدين امشي... 

_ دخل عبدالله معاهم وقعد في الصاله مع حسن وليلي وروان، وحسن قال بهدوء.. 

حسن 

انت ناوي تقعد فين يا عبدالله عشان احنا كمان برضو نعمل حسابنا للجهاز والحاجات دي؟.. 

عبدالله 

انت عارف يا خالي اني هقعد في البلد شغلي واهلي وامي هناك وما ينفعش اسيب البلد اكتر من اسبوع علي بعضه.. 

اتنهدت روان بضيق وحسن قال بهدوء

تمام واحنا هنظبط امورنا علي ان البيت بتاعكم في البلد هيتغير الفرش بتاعه وروان تختاره بقي.. 

عبدالله 

بس البيت كبير اووي يا خالي، نشيل الموضوع سوا واحنا اهل مش اغراب.  

حسن 

لا يا عبدالله الاصول اصول، ودي عداتكم في البلد ان العروسه هي اللي تجيب الفرش كله بتاع المكان اللي هتقعد فيه... 

عبدالله بهدوء

طيب انا عندي حل انا عندي شقه هنا لما باجي اخلص شغل بقعد فيها قريبه من الشركه بتاعتي انا وسيف، تفرشها روان براحتها ولما هاجي هنا هجيبها معايا اكيد ويبقي بيتها برضو... 

ليلي

كلك ذوق يا عبدالله والله، قولت ايه يا حسن؟.. 

حسن 

اللي فيه الخير يقدمه ربنا.. 

عبدالله 

طيب وانتي يا روان ناويه علي ايه بقي؟.. 

حسن 

مش هتدخل الجامعه اللي في الصعيد.. 

_ابتسمت روان بفرحه وفكرت ان حسن هيخليها تكمل دراستها هنا في القاهره، بس اختفت ابتسامتها وحل مكانها الحزن اول ما حسن كمل كلامه وقال.. 

حسن

هتفضل هنا بس تيجي تاخد فترة الامتحانات هنا بس ومش مهم تحضر محاضرات هي كده كده ما كانتش بتحضر اصلا، وده طلبي منك انك. تسيبها تاخد فترة الامتحانات هنا.. 

عبدالله 

اذا كان كده تمام يا خالي اتفقنا.. 

وقام وقف وقال 

همشي انا بقي عشان اتأخرت والله، وامي قاعده مع خالي عز يومين وهبقي ابعت حد ياخدها لو سيف ما كانش فاضي... 

حسن 

لا لا ما تشغلش بالك انت انا هبقي اوصلها البلد بنفسي مش هينفع تمشي لوحدها.. 

عبدالله 

تمام يا خالي بعد اذنكم.. 

مشي عبدالله وليلي قالت

والله الواد ده متربي شوفت يا حسن عشان ما يتقلش علينا في العفش بتاع البيت في البلد لانه كبير، قال علي موضوع الشقه اللي هنا.. 

بص حسن بحده لروان وقال

علي الله بس بنتك تقدر قيمة اللي معاها وما تبصش تحت رجليها... 

_قال كلامه ودخل اوضته وليلي كمان دخلت المطبخ، وقامت روان وراخت ورا حسن وخبطت علي الباب بهدوء وبعدين دخلت لقيته بيطلع هدومه من الدولاب عشان يروح الشغل.. 

بصلها بضيق وقال

عايزه ايه؟.. 

روان بدموع 

انا وافقت بعبدالله عشانك انت بس انت عارف اني مش هقدر اعيش في البلد وعقابك صعب اوي يا بابا.. 

حسن بحده 

هو انتي شايفه ان جوازك من عبدالله عقاب. انا كده بحافظ عليكي وبحميكي من دماغك اللي كانت هتوديكي وتودينا في داهيه، ومش هقبل اي نقااش في الموضوع ده عشان هتتجوزيه يعني هتتجوزيه يا روان واللي هو يقوله انا معاه فيه ومش هختلف معاه في اي حاجه، وغوري من هنا انا مش طايق اشوف وشك يلااا.. 

_طلعت روان من عنده وهي بتعيط، ودخلت اوضتها ومسكت موبيلها اللي كان بيرن برقم امير، وقامت بسرعه قفلت الباب كويس وردت عليه وقالت.. 

روان بحده 

عايز ايه بتكلمني تاني ليه؟.. 

امير

انتي لسه زعلانه من اللي حصل، انا اتصدمت ان باباكي جه وما عرفتش اتصرف و.. 

روان بعصبيه 

بطل كدب انا عرفت انت كنت شايفني ازاي، انا اللي كنت عبيطه وصدقت انك بتحبني بس انت اللي زيك ما بيعرفش يحب بني ادم مريض وحيوان.. 

امير

ما تكبري دماغك من كلام الافلام ده ويلا نتقابل، والله مستعد اكنسل صحابي واخرج معاكي انتي.. 

روان بحده 

اقفل يالا واقسم بالله لو شوفت رقمك تاني عندي لافضحك وسط صحابك يا عرة الرجاله.. 

_وقفلت في وشه وعملت بلوك لرقمه، وقالت لنفسها بعصبيه وغيظ... 

روان 

انت السبب في اللي انا فيه ده يا امير منك لله ربنا ياخدك... 

ــــــــــ #بقلم_الكاتبه_رحاب_القاضي ــــــــ

_وقدام النيابه طلع من هناك طارق ومعاه عبدالله وعمر اللي قال لطارق بهدوء.. 

عمر

مبروك يا طارق حقك رجعلك بس تاخد بالك بعد اكده... 

طارق

لا اللي هو انا مش عارف استوعبه انك محامي والله كانت رايحه عن بالي اووي الحكايه دي.. 

عبدالله 

هو انا في حد بيخلصلي شغلي غيره، بس ايه رئيك فيه دماغ شياطين.. 

طارق باعجاب

لا فكرة انه يعمل اللي عملو ده جوه ويجيب تسجيل كاميرات المحل بأذن نيابه ويثبت ان عمرو هو اللي زور الورق ومضاني علي حاجه ما اعرفهاش لا بجد شابوو.. 

عمر

الواد ده غبي اصلاً طيب حتي كان غير التاريخ، بس دي نقطه في صالحنا تاريخ تسجيل الكاميرا هو نفس التاريخ اللي في العقد، وكده كده لو كان العقد اتحول مدني من اول جلسه كنت هعمل مذكره بالنبنود الخطأ اللي فيه وكان هيتفسخ، تلاقيه كان جايب محامي نص كم كتبله العقد ده.. 

طارق 

بجد شكرا يا عمر انت وعبدالله انا من غيركم كان زماني خسران كل حاجه بجد.. 

عبدالله 

ما عملناش حاجه يا عم، المهم تعالي هنروح للواد سيف وناخده ونروح نتغدي سوا قبل ما امشي انا وعمر.. 

طارق

لا لا انا مش فاضي لسه رايح اشوف موضوع جواز السفر بتاعي واحجز تذكره وحوار كبير.. 

عبدالله 

جواز سفر ايه وتذكرة ايه؟!.. 

طارق بجمود

ما انا خلاص فشلت هنا بكل الطرق، مش هحازل تاني في البلد دي هسافر انجلترا عند خالي وهناك يمكن اقدر احقق اللي ما عرفتش احققه هنا.. 

عبدالله بضيق

انت ليه ما بتسمعش غير نفسك، انت هتنجح لما تبدأ بنفسك وتتغير، اللي هتحققه هناك هتحقق اكتر منه هنا لو ركزت في اللي في ايدك واقتنعت بيه.. 

طارق بضيق

انا شبعت من الكلام ده اللي بسمعه من كل اللي حواليا وما بغيرش حاجه، انا اخدت قرار والاسبوع الجاي مش هكون موجود هنا سلام... 

قال كلامه وسابهم ومشي وعمر قال بهدوء

سيبه يسافر انت هتحكم عليه يعني يا ولد عمي؟.. 

عبدالله بحزن

انا مش صعبان عليا غير خالي، طارق ده بالنسباله الحيله ومن حقه يسند عليه في الدنيا بعد ربنا فانه يسيبه ويمشي كده مش هيكون الموضوع ساهل خالص علي خالي حسن.. 

عمر

اللي فيه الخير يقدمه ربنا، تعالي بقي نروح لسيف عشان نشوف اللي ورانا قبل ما نعاود البلد.. 

ــــــــــ #بقلم_الكاتبه_رحاب_القاضي ــــــــ

_وفي بيت فيروز.. 

كانت قاعده جنب زين اللي كان بيفطر وبتبصله بأبتسامه بسيطه ودموع، ولما اخد هو باله منها قال بقلق.. 

زين 

في ايه يا ماما بتبصيلي كده ليه؟.. 

فيروز

مبسوطه بيك اوقات كتير ببصلك واقول لو كان ابوك زمان مشي وانت ما كنتش موجود انا كنت هعيش ازاي، بس ربنا بعتك ليا وقتها عشان تهون عليا وتصبرني علي وجعي ومازلت للنهارده انت الحاجه والوحيده اللي بتفرحني وبتهون عليا وجع كل حاجه... 

زين 

وفي الاخر تزعلي لما قلبي يوجعني ما هو من كلامك الرايق ده يا ست الكل.. 

ضحكت فيروز بهدوء وقالتله

هههههه سلامة قلبك يا حبيبي.. 

_وفي الوقت ده الباب خبط وقامت فيروز فتحت الباب واتفاجئت بجود عزالدين قدامها، فأتنهدت بضيق وقالت.. 

فيروز

يا نعم عايز ايه؟.. 

عز بهدوء

ابني فين؟.. 

فيروز بحده 

وانت ماااالك... دلوقتي عايز ابنك؟.. 

عز

البركه فيكي كنتي مخبياه عني عشرين سنه يا وليه يا قادره.. 

فيروز

كنت بحمي ابني من قسوتك.. 

زقها عزالدين بهدوء ودخل وقال

طيب اوعي بقي.. زين انت فين يالاااا.. 

قام زين وبصله بضيق وقال

نعم.. 

عزالدين

متربي وبتقول نعم مع ان التربيه ما عدتش علي امك ولا اهلها... 

فيروز بسخريه

حصل من يوم ما عرفتك وانا واهلي بقينا كده ده انت تخلي المؤمن يكفر.. 

عزالدين 

طيب روحي بقي شوفي هتعملي ايه لحد. ما اتكلم مع ابني شويه لوحدنا... 

فيروز بقلق

انا مش هسيبه معاك لوحدكم، الله واعلم انت في نيتك ايه عايز تعمله.. 

عزالدين 

هيكون ايه اللي في نيتي، انا مستحيل أذي ابني.. 

زين بهدوء

طيب اتفضل حضرتك نقعد ونتكلم احنا التلاته، اصلا اللي حضرتك هتقولو انا هقولو لماما برضو مش هخبي عنها حاجه.. 

عزالدين

امم ماشي يا ابن امك اقعد.. 

_وقعدو هما التلاته وقام زين دخل المطبخ وعز وفيروز كانت نظراتهم لبعض كلها عتاب ولوم وطلع زين من المطبخ وحط كوباية العصير قدام عز وقاله.. 

زين 

اتفضل.. 

عز

شكرا يا حبيبي، المهم تقوم تلم هدومك عشان هتيجي معايا.. 

بصتله فيروز بقلق وقالت

يجي معاك فين، انا ابني مش هيسيبني.. 

زين بهدوء

انا مش هسيب ماما لوحدها.. 

عزالدين

وانا ابوك وليا حق عليك زي ما بتقعد عند امك تقعد معايا.. 

فيروز

وانت عملتله ايه عشان يقعد معاك؟.. 

عز بخبث

هعمله كل حاجه لو عايز قصر يقعد فيه هجيبهوله دلوقتي، ومن بكره يروح ويختار العربيه اللي هو عايزها ده طبعا بعد ما نغير اسمه ويكتب اسم ابوه الحقيقي ورا اسمه، وكل اللي نفسه هيجيله لحد عنده، ها يا زين قولت ايه؟.. 

زين بهدوء

شكرا جدا لحضرتك بس انا ما ينفعش اجي اقعد معاك واسيب ماما لوحدها.. 

قربت منه فيروز وباسته من خده وقالت

تسلملي يا قلب ماما.. 

ابتسم عز بخبث وقال

طيب والحل ايه بقي، انا اقولكم الحل انا اجي اقعد معاكم ومستعد ارد امك دلوقتي وو.. 

قاطعته فيروز وقالت بحده 

ترد مين يا ردت المايه في زورك.. 

ضحك زين بهدوء وعز قالها بغيظ

ده انا هضحي كده وارضي بيكي تاني.. 

قامت فيروز وقالت بعصبيه

زين اما الراجل ده يغور من هنا ابقي كلمني عشان اجي، انا قاعده في الاتيليه بتاعي تحت.. 

عز 

الاتيليه اللي جبايه بفلوسي.. 

فيروز 

بحقي تمن اسوأ شهرين قضيتهم في حياتي معاك.. 

عز بخبث

والله ما كنتي بتقولي زمان ان احلي ايام في حياتك بتعشيها معايا... 

فيروز بتوتر 

انا نازله يا زين ابقي خد العلاج بتاعك ما تنساش.. 

_قالت كلامها وسابتهم ونزلت وعزالدين مسك كوباية العصير وشربها بهدوء وبعدين قال لزين بجديه.. 

عز

سيبك مني ومن امك انت جدع انك مش هتسيبها وهي عرفت تربي راجل بجد ، بس مش جدع انك عايزني ابقي بعيد عنك... 

زين 

لو كنت عايزك تبقي بعيد ما كنتش صممت واقنعت ماما اني الاقيك... 

قام عز وقعد جنبيه وقال

بص انا مش هقولك انت عشت معاها اللي عدي كله ودلوقتي تعيش معايا انا، لان مش هيهون عليا اخليك تسيبها كفايه اللي عملتو انا زمان، بس قسم الاسبوع بينا شويه عندي وشويه عندها، وعايزك تدخل وسط عيلتك عيلة ابوك وتبقي واحد من العيله ومش اي حد. كمان، انت هتبقي احسن من الكل وتنجح في اللي انا فشلت فيه، ولما تتخرج هعملك مستشفي كبيره بأسمك وهخليك من احسن دكاترة البلد وخصوصا انهم بيقولو عليك شاطر وهتساعدني في ده.. 

زين بنبره حزينه 

مش عارف اقولك ايه بس انا مريض قلب قولتلك قبل كده، وكمان بدرجه كبيره يعني احتمال كبير ما الحقش اي حاجه من اللي انت بتقول عليها دي.. 

عز بحده 

ما فيش الكلام ده انت هتتعالج وكل اللي انا قولت عليه ده هيحصل ان شاء الله، ابوك مش هيسيبك علي رأي ليلي مرات عمك هو انا كنت لاقي عشان اسيبك تضيع مني بسهوله كده.. 

ابتسم زين بدموع وقاله 

هو ممكن احضنك.. 

عز بابتسامه واسعه 

مع اني مش بحب احضن غير ستات بس ما علينا تعالي في حضن ابوك يا زين... 

_حضنه زين وهو بيضحك بهدوء، ولاول مره عزالدين يحس بوجوده وانه ابنه بجد. واتملت عيونه دموع وضمه ليه اكتر وقال.. 

عز 

هيتعوض كل اللي ضاع مني هيتعوض بيك انت يا زين... 

ــــــــــ #بقلم_الكاتبه_رحاب_القاضي ــــــــ

_وبالليل في بيت الاستاذ حسن.. 

دخل عز الدين وهو قلقان جدا ولقي حسن واقف وهو ماسك موبيله وباين عليه الخوف جدا، وليلي قاعده بتعيط وجنبيها روان وعلياء وروفان وروز وطارق بيحاولو يخلوها تهدي... 

عز

هو في ايه مالكم.. 

حسن بقلق

رضوي لحد. دلوقتي ما جاتش وطارق راح الشغل اللي هي فيه مالقاش حد والامن هناك قاله انها جات الصبح وركنت عربيتها هناك ومشيت.. 

ليلي ببكاء

اكيد عملت في نفسها حاجه، كله من ابنك يا علياء.. 

علياء

الله يا ليلي هو ده وقته ورضوي عاقله ما تعملش كده اكيد في حاجه معاها.. 

عز 

طيب اهدو وانا هكلم يونس صاحب الشركه وهسأله عليها يمكن عندها شغل زياده ونسيت تقولكم.. 

ليلي ببكاء

بيقولك موبيلها مقفول، انا بنتي فيها حاجه انا طول اليوم وانا قلبي مقبوض هتولي بنتي.. 

حسن 

ما خلاص بقي يا ليلي انا اعصابي مش ناقصه. 

طارق بضيق

مليون مره اقول الحريم مالهاش شغل دول اخرهم المطبخ ما حدش بيسمع مني.. 

روفان 

وانتو بقي اللي ليكم شغل، ده انت مضحوك عليك يالا.. 

مسكها طارق وعضها في ودنها وقال بغيظ

عايز اسمع صوتك. تاني يا عقربه انتي.. 

.

روفان ببكاء

الحقني يا بابا كل ودني.. 

حسن بعصبيه

اقسم بالله اللي هسمع صوته تاني لاكسر عضمه يا بارد منك ليها... 

وقال لعز بنفس عصبيته

وانت كلم صاحبك ده وخلصني.. 

عز 

اديني اهو بكلمه.. 

ــــــــــ #بقلم_الكاتبه_رحاب_القاضي ــــــــ

_وفي الوقت ده في بيت يونس الصاوي كان قاعد بيتعشي وجنبيه شهد ويوسف ويارا، وقدامهم يزن وسدرا... 

يونس 

قولي يا يزن مش ناوي تفرحني وتخليني ابقي جدو.. 

اتنهدت سدره بضيق ويزن قال بهدوء

لسه ما حصلش نصيب يا بابا.. 

يونس

طيب ابقي اديكم اسم دكتور كويس عشان لو في مشكله يعني تعالجوها من الاول.. 

سدره بحده 

وحضرتك دخلك ايه في الموضوع ده، اظن دي حاجه بيني انا ويزن وما حدش ليه حق يتدخل فيها.. 

يوسف بغيظ

انتي بتتكلمي كده ليه الحق عليه انه خايف عليكم.. 

يزن بحده 

وانت مالك يا يوسف هي وجهتلك كلام.. 

يونس بحده 

بس منك ليه اقفلو الموضوع، وانت يا استاذ يزن ابقي علم مراتك ازاي تتكلم معايا كويس.. 

يزن بجمود

هي ما كانتش تقصد يا بابا، ومعلش يعني دي حاجه بيني وبينها ومش عايزين حد يتدخل فيها.. 

_ابتسمت سدره وهي بتبص ليونس ويوسف بشماته، وقبل ما يرد يونس قالت شهد بهدوء.. 

شهد 

طبعا يا حبيبي دي حاجه تخصكم، وباباك كمان ما يقصدش حاجه هو بس عايز يطمن عليكم.. 

يوسف بخبث

ايه يا يارا يا حبيبتي مالك ما بتاكليش ليه؟.. 

يارا بعدم فهم 

مانا باكل اهو يا يوسف.. 

يونس بقلق

مالك يا حبيبتي في حاجه؟.. 

يارا 

لا ما فيش يا بابا والله.. 

يوسف 

لا لا انتي ما بتاكليش كويس وانا هاكلك بنفسي.. 

يونس 

لا انا اللي هاكل بنتي قومي يا شهد اقعدي الناحيه التانيه وهاتي بنتي حبيبتي جنبي.. 

شهد بغيظ

في ايه منك ليه ما البت كويسه.. 

قام يزن وقال

خليكي يا ماما مرتاحه وانت قوم يا يوسف اقعد مكاني ما حدش هيأكل اختي حبيبتي غيري.. 

ضحكو كلهم بهدوء وقعد يزن جنب يارا اللي قالتله

اقسم بالله انا باكل كويس انت عارف حركات يوسف.. 

يزن وهو بيقرب المعلقه منها

هو اول مره نتخانق علي مين ياكلك من اول ما اتولدتي اصلا وانا وبابا ويوسف بنتخانق علي مين يدلعك اكتر.. 

_ابتسمت بهدوء وفضلت تاكل من ايد يزن، وقرب يوسف من سدره اللي بتبص ليزن بغيظ وحقد وقال بطريقه مستفزه.. 

يوسف

اتفرجي وملي عينك من الدلع والحنيه اللي عمرك ما حسيتي بيهم يا مرات اخويا، بس دي يارا الملاك مش سدره الشيطانه بنت طنط دارين الا هو ينفع اقول علي امك الله يرحمها ولا ما يجوزش عليها الرحمه.. 

بصتله سدره بحقد ودموع وقالت

انا شبعت وطالعه شقتي بعد اذنكم... 

_سابتهم وقامت وفي الوقت ده موبيل يونس رن برقم عز، فرد عليه بهدوء وقال.. 

يونس

حماتك بتحبك بس ياتارا انهي حما فيهم؟.. 

عز

ولا دي كانت بتطيقني ولا دي كانت بتقبلني المهم، هو انت اديت شغل لرضوي بنت اخويا النهارده زياده، اصلها ما جاتش لحد. دلوقتي وعربيتها في اللوكيشن بتاع الشغل. 

يونس

لا مش عارف ثواني هسأل الولاد.. 

وبص ليزن وقال

يزن البشمهندسه رضوي كان عندها شغل زياده النهارده؟... 

بصلهم يوسف بقلق ويزن رد علي يونس وقال

لا هي ما جاتش الشغل النهارده اصلا والعمال مشيو، وكنت لسه هسأل يوسف هما ليه ما راحوش الشغل النهارده هما الاتنين.. 

يوسف بقلق

هي كانت الصبح في اللوكيشن انا شوفتها.. 

يونس قال لعز

يا عز بيقولو انها كانت الصبح في اللوكيشن.. 

عز

ما العربيه لسه في اللوكيشن هناك بس هي مختفيه لحد دلوقتي.. 

يونس 

طيب اقفل وانا هكلم حد من الامن يدور عليها هناك ولو في جديد عندك طمني.. 

يوسف بخوف 

هي ايه الحكايه... 

يونس

رضوي بنت اخوه اللي شغاله معاك في المشروع الجديد بيقولو عربيتها في الموقع وهي مختفيه.. 

يزن 

حتي العمال لما مالقوهاش ولا لقيو الاستاذ مشيو والنهارده ولا حاجه اتعملت في الشغل.. 

_افتكر يوسف اللي عملو فيها الصبح وقلبه اتقبض لفكرة انها لسه محبوسه في الاوضه الضلمه لحد دلوقتي، فقام بسرعه كبيره ومشي.. 

شهد 

ماله ده راح فين؟.. 

ابتسم يونس بشك وقال

سبيه اما نشوف هيعمل ايه.. 

ــــــــــ #بقلم_الكاتبه_رحاب_القاضي ــــــــ

_وعند يوسف كان ساايق عربيته بطريقه جنونيه عشان يوصلها وخوفه عليها عدي اي تفكير ممكن يجي في باله، وافتكر اخر حاجه قالتهاله قبل ما يقفل عليها الباب لما كانت خايفه وبتترجاه انه ما يقفلش عليها الباب لانها بتخاف من الضلمه.. 

_واول ما وصل الموقع نزل بسرعه من العربيه وجري بسرعه علي الاوضه اللي فيها رضوي، وفتح الباب اللي كان بيتفتح من بره بس واول ما شافها اتفاجئ من شكلها وهي واقعه علي الارض وراسها بتنذف بشكل كبير.. 

_راحلها بسرعه ورفع راسها عن الارض وقال بدموع وخوف.. 

يوسف

رضوي ردي عليا انا اسف وااله ما كنتش اقصد، رضوووي... 

_وشالها بين ايديه وطلع بيها بسرعه حطها عربيته بهدوء وزاد خوفه اضعاف لما الجرح اللي في راسها كان لسه بينذف والدم نزل علي وشها .. 

يوسف

ينهار اسود البت بتموت مني يا نهااار اسود.. 

_وبسرعه ركب عربيته ورااح لاقرب مستشفي ، واتنقلت بسرعه لاوضة العمليات ويوسف مسك في الدكتور وقال.. 

يوسف 

استني يا اسطا هنا فهمني ليه هتدخل عمليات؟.. 

الدكتور

اولا اسمي دكتور مش اسطي، ثانيا الحاله صعبه دي متصفيه خالص ولازم تدخل عمليات لان الجرح صعب ومالمش الوقت ده كله ولا اتعملها اسعافات اوليه ده علي الله نلحقها وما تقابلش وجه. كريم.. 

وسابه الدكتور ويوسف قال بخوف

ايه الدكتور البومه ده، لا اكيد. مش هيحصلها حاجه يا نهاااار اسود.. 

_راح قعد علي الكنبه اللي قدام اوضة العمليات وهو مش مستوعب كل اللي حصل، وللحظه واحده سأل نفسه هو ليه عمل فيها كده عشان يكسرها قدامه ولا عشان هي بتستفزه ولا عشان مش راضيه تعامله بالطريقه اللي متعود عليها من كل البنات عرفهم... 

قام ووقف عند الشباك وقال بندم 

اي كان السبب انا واحد حيوان ما كانش ينفع اعمل فيها كده، هي ما تستاهلش... 

_وفضل علي الحال ده اكتر من ساعه وتفكيره كله في رضوي واللي هي بتمر بيه بسببه، وطلع الدكتور فراحله بسرعه يوسف وسأله بقلق وخوف ولهفه كبيره.. 

يوسف 

طمني يا دكتور هي كويسه مش كده؟.. 

الدكتور

مش كده ومش كويسه وحالتها زي الزفت، البت بتنزف من سعات ولسه فاكرين تجيبوها المستشفي دلوقتي.. 

يوسف بغيظ

كان عندها ظروف خاصه فاجلناها شويه.. 

وتابع كلامه بحده 

ورد علي ميتين امي البت كويسه ولا لا؟.. 

الدكتور بيأس

كويسه ازاي يا اخ ااا انت اسمك ايه؟.. 

يوسف بنفاذ صبر

اقسم بالله هرقدك جنبيها، انطق البت فيها ايه؟.. 

الدكتور ببرود

اتخبطت في دماغها خبطه جامده جات جنب العرق فنزفت، وعشان النزيف طول شويه الحاله بقيت صعبه احنا وقفنا النزيف وخيطنا الجرح بس لما هتصحي وارد يبقي عندها ارتجاج المخ وفقدان في الذاكره وسوء رؤيه وضعف بسبب النزيف وهتبقي ديماً تعبانه ومش قادره تتحرك لفتره كده يمكن اسبوعين تلاته او شهر وممكن ما تقومش خالص ونرتاح من كل اللي قولناه في الاول ده وتبقي الاعمار بيد الله.. 

يوسف بعصبيه 

يالا يا بومه يا ابن الهبله امشي من هنا وشوفولي دكتور تاني يعالج البت، انا يوسف الصاوي ولو كلامي ما اتنفذش هطربقها علي دماغكم.. 

جات الممرضه جنبيه وقالت

يا استاذ صوتك في ناس تعبانه هنا وانت كده بتزعجهم... 

يوسف 

هو انا ليه ما حدش عمل اهتمام لكلامي؟.. 

الممرضه

يمكن عشان دي مش المستشفي بتاعت اهلك وانت مش البطل اللي عنده عضلات وجماله بيخلي البنات يغمي عليها. فوق يالااا احنا هنا في الواقع، يخربيت الورايات والتركي اللي لحس دماغكم

_قالت كلامها وسابته ومشيت ويوسف بصلها بقلق وقال.. 

يوسف

يا ولاد المجانين... 

_ ودخل الاوضه اللي فيها رضوي ولقي الممرضه بتنفض السرير وما فيش حد غيرها.. 

يوسف بخوف

البت فين وديتو البت فين؟.. 

الممرضه 

بت مين؟.. 

مسكها يوسف من قفاها وقال

البت رضوي اللي كانت هنا اللي كانت في العمليات من شويه.. 

الممرضه 

وايه اللي هيقعدها في العمليات كل ده، نقلناها حضرتك لاوضه عاديه.. 

يوسف 

انتي هتستهبلي يا اختي انا واقف بره ما شوفتكمش طلعتوها.. 

الممرضه 

طلعناها من الباب التاني ده علي الاوضه علي طول.. 

يوسف سابها وقال

يا مستشفي مجانين، اااه يا مستشفي مجانين.. 

_وراح وقف قدام الاوضه اللي فيها رضوي وقبل ما يدخل طلع موبيله وكلم باباه اللي رد عليه وقاله.. 

يونس

ها لقيتها؟. 

يوسف

وانت عرفت منين اني روحت ادور عليها؟.. 

يونس

مش وقتها المهم لقيتها ولا لا؟.. 

يوسف 

رضوي في المستشفي اللي جنب اللوكيشن اللي علي الطريق، كلم اهلها وخليهم يجو وانت تعالي برضو عشان انا مش هعرف اتصرف معاهم لوحدي.. 

يونس بقلق

البت في المستشفي ليه انت عملت فيها ايه يا يوسف.. 

يوسف بقلق

لما تيجي هقولك كل حاجه، المهم بس انها دلوقتي كويسه واهلها لازم يجو عشان يطمنو عليها.. 

يونس بحده

اقسم بالله لو البنت كان اللي حصلها ده بسببك وبسبب قلة ادبك مش هيحصلك كويس يا يوسف.. 

_قال كلامه وقفل في وشه ووقف يوسف شويه قدام اوضة رضوي وبعدين دخل عندها واول ما شافها نايمه علي السرير وفي ايدها المحلول، اتحولت نظراته ليها للحزن والخوف، واخد الكرسي اللي جنب الباب وحطه جنب السرير وقعد عليه وبصلها بهدوء وقال.. 

يوسف

انا عمري ما خوفت علي حد. قد ما خوفت عليكي كده، انا كنت بتمني ان الوجع اللي فيكي كله يجي فيا انا ما حبتش فكرة انك تعبانه او ممكن تحصلك حاجه.. 

_ومد. ايده بتردد ومسك ايدها بهدوء وابتسم بسخريه وقال... 

يوسف

بقي الايد الصغيره دي كانت هتكسر ايدي قبل كده، بس انتي لو ما كنتيش عملتي كده كنت هشوفك عاديه وما كنتش هشوفك بالطريقه اللي شايفك بيها دلوقتي... 

واتنهد تنهيده طويله وقال

وما كنتش حبيتك بالطريقه دي يا رضوي♥... 

ــــــــــ #بقلم_الكاتبه_رحاب_القاضي ــــــــ

_وفي الوقت ده في اوضة يارا بنت يونس.. كانت واقفه بتكلم زين في الموبيل وقالتله بقلق.. 

يارا

يا زين خلاص ما قولتلك يوسف حل الموضوع.. 

زين بضيق

بعد ايه حل الموضوع، ومين ده اصلا ومن امتي بيدايقك.. 

يارا 

مم فتره كده بيدايقني بس انا قولت لياسمين صاحبتي وهي قالتلي عادي كل بنت بتتعرض للمواقف دي والتصرف الصحيح للبنت المحترمه انها تسكت وتتجاهل... 

زين 

لا ناصحه انتي وصحبتك يا يارا، بس اللي قالته ده غلط والصح ان اللي يدايقك بنص كلمه تقلعي اللي في رجلك وتنزلي بيه علي دماغه ويبقي اقل واجب.. 

يارا 

انت عايزني انا اقلع اللي في رجلي واعمل كده، انا لو حاجه وقعت مني في الشارع بتكسف اقف قدام الناس واخدها فبسيبها واقعه وامشي، قال اضربه باللي في رجلي قال.. 

ضحك زين بهدوء وقال

هههههه والله انتي نكته بس علي الاقل ما تسكتيش قولي لاي حد، وليه اي حد انتي من الاول لو كنتي قولتيلي علي الولد ده انه بيدايقك انا كنت هتصرف معاه.. 

يارا

بس انت مش بتاع مشاكل وانا ما ينفعش ادخلك في مشاكل بسببي.. 

زين 

هبقي بتاع مشاكل مع اللي يقرب منك او يدايقك.. 

ابتسمت يارا بكسوف وقالت بتوتر

طط طيب انت خفيت وكويس دلوقتي ولا لا؟.. 

زين 

لا الحمدلله انا دلوقتي احسن بكتير، علي فكره بابا جه النهارده هنا واتكلم مع ماما ومعايا وحسيت لاول مره انه متقبلني ومحتاجني زي ما انا محتاجله.. 

يارا

طيب كويس اووي، علي فكره عمو عز كويس انا اعرفه من زمان، بس اللي عمري ما كنت اتوقعه انك انت ابنه.. 

زين بهدوء

سبحانه بقي، الله واعلم لسه النصيب فيه ايه تاني، المهم انا عايز اشوفك.. 

يارا بتوتر

ايه بتقول ايه اقف في مكان فيه شبكه.. 

زين 

واقف في مكان فيه شبكه وانتي سمعاني وهشوفك يا يارا.. 

يارا بقلق

مش هينفع افرض حد شافنا تاني.. 

زين

ما يشوفنا وبعدين انتي اللي هوفتي بزياده الصوره اللي كانت مع الزفت اللي هددك ده ما فيهاش اي حاجه تخلي حد يشك فيا وفيكي اصلا وهقابلك وانتي مع ياسمين تمام كده؟.. 

يارا بضيق

طيب ممكن نخليها وقت تاني؟.. 

زين 

براحتك يا يارا، هقفل عشان عندي مذاكره سلام.. 

_قال كلامه وقفل معاها، وهي فضلت قاعده في اوضتها مدايقه، وبعدين قامت وراحت لاوضة شهد اللي كانت قاعده علي مكتبها الصغير في اوضتها وبتشتغل.. 

شهد 

في ايه يا يارا مش المفروض نايمه عشان عندك مدرسه الصبح.. 

يارا

مش جايلي نوم هو بابا خرج من شويه راح فين؟... 

شهد 

مش عارفه قال عنده شغل، المهم انتي مش جايلك نوم ليه؟.. 

يارا بقلق

اا انتي عارفه يا ماما الولد اللي حكيتلك عنه قبل كده يبقي مين؟.. 

شهد بفضول 

مين يا حبيبتي؟.. 

يارا بتوتر 

يي يبقي زين ابن اونكل عزالدين وطنط فيروز.. 

شهد بصدمه

مين ياروح امك مالقتيش غير ده يا يارا ابن اكبر خازوق في الروايه.. 

يارا

ومالو هو باللي حصل كله، وو وبعدين هو احنا اصدقاء وبس.. 

شهد بهدوء حاولت تصنعه بصعوبه

طيب خلاص تعالي احكيلي الموضوع بالتفصيل وعرفتو بعض ازاي... 

ــــــــــ #بقلم_الكاتبه_رحاب_القاضي ــــــــ

_وفي المستشفي.. 

كان لسه يوسف قاعد. جنب رضوي وهو ماسك ايدها وعيونه ما نزلتش من عليها لحد ما دخل عنده يونس وقال بعصبيه.. 

يونس

ايه مستشفي المجانين دي اللي انت جيت فيها.. 

يوسف 

وطي صوتك يا بابا البت تعبانه.. 

يونس بص لرضوي وقال

اممم وهي وقعت ازاي بقي علي دماغها يا فالح؟.. 

يوسف بتوتر

هو بسببي بس انا كنتش اقصد وتعالي بره بس وانا هفهمك... 

طلعو بره ويونس قاله

انا كلمت ابوها وعمها وجايين دلوقتي، ايه بقي اللي حصل عشان اعرف اتكلم مع الناس.. 

يوسف بقلق

هي استفزتني فانا كنت بص هو اللي حصل عامل زي الافلام الهندي كده بالظبط والله ومش هتقتنع بيه لو قولته.. 

يونس بصوت واطي

صارحني ما تتكسفش انت حاولت تعمل معاها حاجه والبت صدتك فضربتها... 

يوسف 

في ايه يا بابا مش للدرجه دي والله. كل الحكايه اني كنت عايز احبسها في اوضه عندنا في اللوكيشن شويه ومن غير ما اقصد زقيتها فوقعت وما عرفتش حصلها ايه غير لما روحتلها من شويه... 

يونس

يخربيت ابووك وافرض كانت البت ماتت، وازاي اصلا تعمل كده في البت، بتمد. ايدك علي بنات الناس ليه؟.. 

يوسف

البت عايشه وزي الفل وما حدش كان خايف عليها قدي واقسم بالله، المهم في اهلها لما يجو هتقولهم ايه؟.. 

يونس

انا لا هقول ولا هعمل، انت اتصرف هو انا كنت عملت حاجه للبت.. 

يوسف

يونس يا صاوي مش وقت نداله.. 

يونس

ده انا في اللحظه دي ابو النداله يا صايع يا ابن الكلب... 

_بص يوسف لصوت الدوشه اللي جاي من اول الممر وفجأه ظهرت عيلة الاستاذ حسن كلهم وهما بيجرو ناحيته هو ويونس.. 

يوسف بخوف 

بابا الحقني.. 

يونس بقلق

ايه الجيش ده؟.. 

_وقف قدامهم عيلة حسن كلها وكلهم بيسالوهم عن رضوي في نفس الوقت، وروفان مسكت في رجل يوسف وبتقوله.. 

روفان 

رد عليا اختي فين؟.. 

يوسف 

اوعي يا سكر البنطلون هيقع.. 

يونس بحده 

اهدوو اهدي يا عز انت واهلك دول، رضوي كويسه بس حصلتلها حادثه بسيطه.. 

ليلي صرخت وقالت

يالهوي حادثه بنتي فين بنتيييي.. 

علياء

اهدي يا ليلي يا استاذ اتكلم علي طول.. 

حسن بخوف

في ايه مخبينو عني اتكلمووو.. 

يوسف 

رضوي زي الفل جوه بس نايمه شويه لانها انخبطت في دماغها، وشويه وهتقوم.. 

_سابوهم كلهم ودخلو الاوضه عند رضوي وفضل عز اللي قال.. 

عز 

انت عرفت منين مكانها؟.. 

يوسف

انا يا اونكل عز دورت عليها ولقيتها وجيبتها المستشفي... 

عز بضيق

عارف يالا لو عرفت ان اللي حصلها ده بسببك انا هشرب من دمك.. 

يوسف بقلق

لا لا انت كده بتظلمني علي فكره.. 

يونس

مش وقته الكلام ده يا عز اطمن علي بت اخوك ولو ابني غلطان هخليك تديه بالجزمة ومش هتكلم... 

يوسف بغيظ

تسلم يا حج ربنا يكرم اصلك.. 

_سابهم عزالدين ودخل عند رضوي، ويونس مشي من جنب يوسف اللي جري ورااه وقاله.. 

يوسف 

بابا استني انا كنت عايز اقولك حاجه.. 

يونس وهو ماشي

خير ان شاء الله وربنا يستر.. 

يوسف بقلق

انا مش عايز اكمل مع عائشه بنت عمي.. 

وقف يونس وقاله

وحياة امك ده انت عملت المستحيل عشان تخطبها جاي دلوقتي تقولي مش عايزها.. 

يوسف

ايوه انا عملت المستحيل عشان اخطبها لان عمي كان مستفز وانا ما حدش يعند معايا واسيبه يكسب.. 

يونس

انت اهبل يالا انت فاهم لو سيبت عيشه هيحصل ايه علاقتي بأخويا هتبوظ، خطوبة اختك وحامد اللي لسه ما تمتش هتبوظ.. 

يوسف

اسمها عائشه يا بابا، وبعدين عمي محمد ما هيثدق يبعدها عني، وانا ما بحبهاش كنت فتكر اني بحبها بس لا انا عمري ما حبيتها، عمري ما حسيت من ناحيتها الحاجات اللي بحسها دلوقتي.. 

يونس بجمود

مع مين بقي اللي ضحكت عليك وكلت بعقلك حلاوه.. 

يوسف بنبره حزينه 

لا هى ما ضحكتش عليا، هي بنت محترمه جدا وبنت نااس وانا متأكد مليون في الميه انها عمرها ما هتشوفني كويس ولا في يوم هترضي بيا ولا هتتقبل مشاعري بس انا غصب عني حبيتها.. 

يونس بقلق

اوعي يا يوسف تكون البنت دي ر.. 

يةسف بثبات وثقه

رضوي انا بحب رضوي يا بابا، رضوي اللي مستحيل تبصلي غير اني واحد فاشل وصايع ونسوانجي.. 

يونس

ومدام انت عارف كده حبيتها ليه؟.. 

يوسف

غصب عني هو بمزاجي، انا يمكن كنت حاسس بكده واتأكدت النهارده.. 

يونس 

وهتسيب ليه عيشه؟.. 

يوسف 

واعيش مع واحده ما بحبهاش ليه؟.. 

يونس 

ما انت قولت ان رضوي مش هتوافق بيك وعيشه كويسه وبنت عمك وبتحبك وانا متأكد انها هتسعدك.. 

يوسف 

وانا ازاي اعيش معاها وانا بحب واحده تانيه، انا مش يونس الصاوي عشان اعمل كده.. 

يونس بحده 

قصدك ايه يالااا؟!.. 

يوسف بضيق

انا عارف ويزن كمان انك اتجوزت ماما وانت بتحب واحده تانيه، وانا عارف انك عمرك ما حبيتها.. 

يونس بعصبيه

اقسم بالله لولا المكان اللي احنا فيه ده لكنت عرفتك مقامك كويس وازاي تكلم ابوك بالطريقه دي.. 

يوسف

طريقتي ما فيهاش حاجه غلط، الحقيقه هي اللي وجعتك انا مالي بقي.. 

يونس 

انا مش انت فعلا، و عيشه انت مش هتسيبها وايه رأيك اني هجوزهالك في اقرب وقت  ، لانك بتتسلي وزي ما قولت انك بتحب عيشه وخطبتها عند في عمك، عامل نفسك دلوقتي بتحب رضوي لمجرد انها رفضتك ومش عارف تطولها هو انا مش فاهمك.. 

يوسف بجديه وهدوء

والله العظيم بحبها ومش هدايقها تاني ولا عايز اشقطها والجو ده، بس مدام حبيت رضوي يبقي انا هظلم عيشه.. قصدي عائشه وانا مش عايز اعمل كده.. 

يونس 

وانت يا حيلتها ما ظلمتش عيشه لما بتصاحب فلانه وتمشي مع غيرها، اسكت يا يوسف عشان كلامك ده مالوش لازمه.. 

يوسف 

ما هو ده اللي اكدلي اني بحب رضوي، انا عايز ابقي كويس في نظهرها حتي لو مش هترضي بيا بس مش عايز ابقي كداب تاني، مش عايز اوجع عائشه ويترد فيا تاني.. 

يونس

الكلام خلص يا يوسف اتغير وابقي كويس مع بنت عمك وخطيبتك، واقسم بالله لو عرفت انك بتدايق رضوي بنت حسن تاني هطردها من الشغل وانت هيبقي حسابك. عسير معايا ومش هخليك تشوفها تاني.. 

    

يوسف 

ما تبقاش الاب الحربايه بقي يا بابا كفايه بلطجي والحمد لله الناس نسيتها انما حربايه وعليا انا فكتير بصراحه.. 

يونس بغضب

بالجزمه في نص المستشفي يا ابن الكلب، غور من قدااامي يلااااا

ــــــــــ #بقلم_الكاتبه_رحاب_القاضي ــــــــ

ما ذنبُ من رأىٰ بعيّنيك بِلاد

إن غِبت عنهُ اغتربَ؟!

_اتفتح باب الاوضه اللي كانت محبوسه فيها رضوي، وطلعت منها وهي خايفه جداً وبتبص حواليها بخوف وجسمها كله بيتنفض، وفضلت ماشيه لوحدها بسرعه عشان تبعد عن الاوضه اللي خايفه منها دي، وفجأه شافت كمال واقف قدامها بس علي مسافه  بعيده شويه منها، واول ما شافته اختفي خوفها وابتسمت من وسط دموعها وقالت.. 

رضوي

كمال.. انا كنت عارفه انك هترجع عشان كده انا مستنيااك.. 

_وراحتله بسرعه بس كانت كل ما تقرب منه المسافه بينهم بتبعد اكتر لحد ما اختفي من قدامها، فضلت تدور عليه وبدأت تخاف تاني واكتر من الاول وهي مش لاقيااه، وفجأه ظهر قدامها يوسف بنفس اللبس والشكل اللي شافته بيه اخر مره لما اتخانق معاها وحبسها في الاوضه.. 

بعدت عنه بسرعه وقالت بخوف

ابعد عني انت ايه اللي جابك هنا؟.. 

يوسف

تعالي معايا انا هطلعك من هنا.. 

رضوي بخوف 

لا ابعد عني انت هتأذيني، انا ما ينفعش اروح معاك.. 

يوسف 

بس انا الوحيد اللي هيساعدك.. 

رضوي بدموع

انت كداب انت بتكدب علي الكل اصلا، انا هروح مع كمال هو كان هنا.. 

يوسف 

هو سابك ومشي تعالي معايا انا هساعدك.. 

رضوي بدموع 

انا بخاف منك اصلا، انا بعمل نفسي جامده قدامك بس انت اكتر حد توكسيك انا شوفته في حياتي ومستحيل اثق فيك ولا اصدقك... 

ضحك بهدوء وقال

علي العموم دوري علي كمال براحتك وانا قاعد مستنيكي هنا.. 

_سابته رضوي ومشيت بسرعه وهي بتدور علي كمال لحد ما وقعت علي الارض وهي ماسكه راسها بألم، وفي الوقت فتحت عينبها ولقيت نفسها في المستشفي وحاسه بألم كبير في راسها وبتاخد نفسها بصعوبه، وانتبهت لصوت ليلي اللي كانت قاعده جنبيخا وقالتلهاا.. 

ليلي

حمدلله علي سلامتك يا حبيبتي انتي كويسه؟.. 

رضوي 

هو ايه اللي حصل بالظبط يا ماما؟... 

ليلي

حادثه بسيطه وراحت لحالها، المهم انتي كويسه... 

رضوي بدموع

لا مش كويسه انا تعبانه اووي ومش قادره احرك راسي خالص.... 

ليلي بقلق

يا قلب امك طيب اهدي دقيقه واحده هروح اندهلك الدكتور واجي بسرعه. ابوكي كان معايا بس راح الشغل وجاي علي طول، دقيقه واحده مش هتأخر.. 

_طلعت ليلي من عندها وهي غمضت عيونها بألم وافتكرت الحلم اللي شافته من شويه، ففنحت عيونها بسرعه وهو بتحاول تبعد تفكيرها عنه، بس في اللحظه دي شافت يوسف واقف قدامها وهو ماسك بوكيه ورد وعلبه تانيه صغيره.. 

رضوي قعدت بسرعه وقالت بخوف

انت بتعمل ايه هنا؟.. 

يوسف بهدوء

جاي اطمن عليكي.. 

رضوي بقلق

يعني انا مم مش بحلم انت حقيقي.. 

ضحك بهدوء وقال

هو انتي بتحلمي بيا ولا ايه؟.. 

رضوي بغيظ

كوابيس وما بشوفش فيها غيرك.. 

_قعد يوسف علي الكرسي قدامها وحط الورد والعلبه الصغيره جنبيها وقال بهدوء.. 

يوسف

ما علينا من لسانك اللي مش هيتلم خالص ده، بس الحمدلله انك قومتي وبقيتي كويسه بقالي تلات ايام كل يوم باجي هنا اطمن عليكي لحد ما امك وابوكي هيطردوني من هنا خلاص.. 

رضوي

ما هما هيعملو كده لما يعرفو ان انت السبب في اللي حصلي.. 

يوسف بجديه 

انا اسف انا غلطان وبعترف اهو اني غلطان ولو عايزه تقولي لاهلك ما عنديش مشكله وكمان لو عايزة تعملي محضر ما عنديش مشكله لو ده هيرضيكي.. 

رضوي 

انت عارف اقوم بس من اللي انا فيه ده وهرنك حتة علقه، انت سيبتي فاقده الوعي في الضلمه.. 

يوسف 

ما انتي ما كنتيش حاسه بحاجه.. 

رضوي 

بس سيبتني في الضلمه والله واعلم انقذوني امتي بقي؟.. 

يوسف 

لا ما هو انا اللي جيت وانقذتك، ما حدش حس بيكي ولما عرفت انك ما رجعتيش بيتكم جريت زي المجنون علي اللوكيشن وكنت مرعوب عليكي وجيبتك المستشفي هنا.. 

رضوي بشك

انت عملت كده بجد؟!.. 

يوسف

ايوه والله وكنت مستعد اعمل اي حاجه بس تبقي كويسه ومش خوف من اي حاجه اد ما كان خوف عليكي.. 

رضوي بتوتر

اا انت شايف ان ده وقت للكلام بتاعك ده عشان تعلقني.. 

ابتسم بهدوء وقال

طيب علي فكره دي اول مره اتكلم معاكي بصراحه، وعارفه الورد اللي هنا ده كله انا اللي جايبه في كل مره كنت باجي اطمن عليكي، والمره دي جيبت شوكلاته لروفان موصياني عليها.. 

رضوي

انت كمان وصلت لروفان اختي، انت عايز مني ايه يا يوسف ما تكبر دماغك مني.. 

يوسف بصلها بهدوء وقال

حاضر اللي انتي عايزااه.. 

رضوي بتعجب

نعمم... انت قولت حاضر كده وخلاص.. 

قبل ما يرد عليها دخلت ليلي وقالت

الدكتور جاي حالا و.. هو انت تاني قصدي رابع.. 

يوسف

ازاي حضرتك يا طنط.. 

ليلي

الحمد لله يا ابني، يوسف بيه هو اللي انقذك يا رضوي، وكمان كل يوم بيجي صبح وليل يطمن عليكي عامل زي اللي عليه ورديه.. 

اتنهدت رضوي بضيق ويوسف قال بهدوء

وهريحكم مني خلاص مدام اطمنت عليها وقامت بالسلامه، الشكولاته بتاعت روفان اهي يا طنط ياريت توصليها ليها وسلميلي عليها.. 

ليلي

تعبت نفسك يا ابني دي كانت بتهزر معاك.. 

يوسف 

لا عادي دي زي اختي.. 

ليلي

تسلم يا ابني قوليلي يا رضوي هو انتي وقعتي ازاي ولا ايه اللي حصلك اصلا؟.. 

رضوي بصت ليوسف بخبث وقالت

هو البشمهندس يوسف ما قالكمش؟.. 

ليلي

هو انت تعرف يا ابني اللي حصلها؟.. 

اتوتر يوسف ورضوي ردت علي ليلي وقالت

يعني مش اووي هو شافني وانا داخله الاوضه اللي فيها الكركيب بتاعت العمال بس ما بعرفش اني وقعت هناك.. 

ليلي قربت منها وباست راسها وقالت

الحمد لله انك قومتي بالسلامه يا نور عيني.. 

يوسف ابتسم بهدوء

طيب انا همشي بقي والف سلامه يا رضوي وفي انتظارك الشغل من غيرك واقف.. 

رضوي بجديه 

البركه فيك المفروض انك مكاني ولو غلبت ابقي كلمني واساعدك لحد ما ارجع.. 

. يوسف بهدوء

اوعدك المره دي هشتغل بجد ومش هخليكي تندمي علي ثقتك دي خالص، بعد اذنكم.. 

_مشي يوسف ورضوي كانت مستغربه طريقته وليلي قالت بخبث وهي بتبص لرضوي.. 

ليلي

باين عليه ابن ناس ومتربي الولد ده.. 

رضوي بتعجب

ما هو ده اللي مستغربااه ده كان اكتر بني ادم وقح وحيوان.. 

ليلي

انتي اللي نظرتك غلط في الناس، المهم مش احسن دلوقتي؟.. 

حطت رضوي ايدها علي راسها وقالت

لا الحمد لله دلوقتي احسن بكتير، هي كانت وجعاني اووي اول ما فتحت عينيا.. 

ليلي

يمكن عشان كنتي نايمه شويه كتير، وهيجي الدكتور يطمنا اكتر دلوقتي... 

ــــــــــ #بقلم_الكاتبه_رحاب_القاضي ــــــــ

_وفي بيت يونس الصاوي..وبالاخص في شقة يزن كانت سدره قااعده بتفطر وهي بتكلم ندي وقالتلها.. 

سدره

يعني انتي متأكده يا ندي ان البت اللي اسمها هدير دي هتنفذ اللي طلبته منها بالظبط؟.. 

ندي

ايوه والله هي نفذت الجزء الاول ولولا البت المهندسه اللي شغاله مع يوسف كانت الخطه الاولي هتنجح.. 

سدره 

لا لا انا كنت حنينه معاه في الاول، انما وحياة امه لاخليه يندم علي اللحظه اللي فكر يستفذني فيها، واقفلي عشان جوزي جاي.. 

قفلت سدره معاها ويزن قعدت جنبيها وقال

كنتي بتكلمي مين؟.. 

سدره بخبث

دي بنت صحبتي اتعرفت عليها في النادي اسمها هدير وبالصدفه طلعت شغاله عندكم في الشركه، المهم انت هتيجي تاخدني من الجامعه النهارده ونتغدي سوا زي ما وعدتني مش كده؟.. 

يزن بضيق

انتي بتاخدي حبوب منع الحمل من ورايا؟.. 

اتوترت سدره وهو كمل كلامه وقال

شوفتها بالصدفه في الحمام، وعشان كده ادايقتي لما بابا جاب سيرة موضوع الخلفه قدامك انتي مس عايزه تخلفي مني اصلا.. 

سدره بهدوء

لا طبعا مش زي ما انت فهمت خالص، كل الحكايه اني مش جاهزه دلوقتي ابقي ام ويبقي عندي بيبي وانا لسه بدرس في الجامعه.. 

يزن 

مش هتتعبي في حاجه معاكي امي وطنط بطه و.. 

سدره بحده 

مستحيل اخلي الاتنين دول يقربو من ابني.. 

تابعت بتوتر

قصدي يعني بطه انت ما تعرفش هي عملت فيا ايه زمان.. 

يزن 

بطه عمرها ما زعلت حد منها، بلاش بقي جو الضحيه اللي بتحبي تعيشيه ده، وتبطلي تاخدي الحبوب دي انا عايز اخلف تمام.. 

سدره بضيق

هفكر يا يزن.. 

يزن بحده 

لا ما فيش هفكر انا قولت كلمه وتتسمع يا سدره تبطلي تاخدي الحبوب دي مفهوم.. 

سدره بغيظ

حاضر حاجه تاني؟.. 

يزن 

انا متأخر ابقي هخلي السواق يوصلك.. 

_قال كلامه وسابها ومشي، وهي كلمت باباها وقالتله.. 

سدره 

صباح الخير يا بابي عامل ايه؟.. 

يوسف 

الحمد لله يا قلب بابي، انتي كويسه وجوزك كويس.. 

سدره 

ايوه الحمد لله، بقولك ايه انا هاجي اقعد عندك يومين هتدايق انت وطنط بطه ولا عادي.. 

يوسف

ايه اللي بتقوليه ده، البيت بيتك وتيجي وقت ما تحبي وغصب عن اي حد، هستناكي النهارده.. 

سدره بخبث

اوكي يا بابي مع السلامه.. 

_قفل معاها وبص لبطه اللي قاعده جنبيه بتفطر وقال بجمود.. 

يوسف

سدره هتيجي تقعد هنا يومين، بلاش تتكلمي معاها في حاجه تدايقها.. 

بطه بحزن

مش هتكلم معاها خالص يا يوسف اطمن.. 

. يوسف بحده 

انتي ليه بتعملي كده، البنت جايه تغير جو انتي مش عايزه تكلميها وتقاطعيها من الهوا ليه؟.. 

بطه بدموع

انا تعبت يا يوسف منك ومن بنتك، اقولك علي حاجه انا هقعد في اوضتي ومش هخرج منها لحد ما بنتك تيجي وتمشي عشان ما حدش يدايقها.. 

يوسف 

يكون احسن برضو انتي بقيتي تخنقي يا بطه، واعملي حسابك انا مش هسمحلك توقعي بيني وبين بنتي وتخليني بعيد عنها فاهمه... 

_ ما ردتش عليه بطه ودخلت اوضتها وهي بتعيط، فتفتكرو هيحصل ايه لما تروح عندهم سدره؟.. 

ــــــــــ #بقلم_الكاتبه_رحاب_القاضي ــــــــ

_وبالليل رجعت رضوي البيت مع عيلتها، وكان الكل مبسوط وفرحان انها خفت.. 

حسن 

خليها تدخل ترتاح في اوضتها يا ليلي؟.. 

ليلي

لا لا تقعد معانا شويه، الدكتور قال نحاول ندخلها في مواضيع وحوارات عشان ما تفقدش الذاكره.. 

روان 

ده دكتور متخلف علي فكره وشمله مسخره اصلا.. 

حسن بحده 

ومن الادب انك تغلطي في حد كده... 

_ادايقت روان من هجوم حسن عليها وطارق دافع عنها وقال بتأييد لكلامها.. 

طارق

معاها حق يا بابا هو دكتور متخلف فعلا.. 

حسن

والله لا هي متربيه ولا انت كمان متربي.. 

روفان 

رضوي مش هند وخالتو ناهد سكنو في الشقه اللي فوق.. 

. رضوي 

جيبتوني ليه البيت بس ما كانت خلتوني المستشفي.. 

ليلي

اتلمي يا بت دي خالتك وبنت خالتك.. 

طارق

المهم طيب كنت عايز اقولكم علي حاحه مهمه.. 

حسن 

خير ان شاء الله؟.. 

طارق

انا خلاص يعتبر بعت الكافي وهرجعلكم فلوسكم اللي كنت مستلفها، وكمان حجزت تذكره لانجلترا وهسافر كمان يومين ومش هرجع غير بعد خمسه او عشر سنين.. 

_وفجأه اتحولت سعادتهم برجوع رضوي لحزن ودموع ملت عيون ليلي وروان ورضوي وروز و؟.. 

_تفتكرو هيحصل ايه؟.. 

ــــــــــ #بقلم_الكاتبه_رحاب_القاضي ــــــــ

_وفي الوقت ده في النادي اللي مشترك فيه يونس الصاوي لعيلته، دخلت يارا مع ياسمين صحبتها كافي حلو جدا وقعدو مع بعض.. 

ياسمين

شوفتي بقالنا اد ايه بنيجي النادي بس اول مره اخد بالي من الكافي الجامد ده... 

يارا 

انا مش بحب اقعد في الكافيهات دي علي فكره، ما تيجب نمشي.. 

ياسمين

لا طبعا المكان حلو واحنا بقالنا كتير ما خرجناش خروجه حلوه، وداخلين علي الامتحانات خلاص ومش هنعرف نخرج تاني، دقيقه هروح الحمام وجايه شوفي هتطلبي ايه بقي واطلبيلي معاكي.. 

يارا

اوكي... 

_مشيت ياسمين ويارا مسكت قائمة المنيو وفضلت تشوف هتطلب ايه، وجه زين في الوقت ده وقعد قدامها وقال.. 

زين 

هو انا عشان اقابلك لازم اكلم ياسمين، النظام ده ما ينفعش معايا علي فكره.. 

يارا بقلق

انت بتعمل ايه هنا، قوم يا زين امشي بسرعه ليكون حد شايفنا.. 

زين 

لا ما حدش شايفنا ولو حد. شافنا فيها ايه ياسمين جايه وهتقعد معانا وهنبقي اصدقاء قاعدين مع بعض.. 

يارا

ما ينفعش النظام ده ما ينفعش معايا انا ولا مع عيلتي ارجوك قوم من هنا يا زين.. 

زين بهدوء

لا مش هقوم وهنقعد وهنتكلم وبطلي الخوف الزياده بتاعك ده.. 

_وخوف يارا في اللحظه دي زاد اضعاف اول ما جه حامد ابن عمها محمد ووقف قدامهم وقال.. 

حامد

بتعملي ايه هنا يا يارا؟.. 

_بصت يارا لزين بخوف، ورد عليه زين بهدوء وثبات وقال؟؟.... 

تفتكرو هيحصل ايه وزين هيرد علي حامد بأيه؟.. 

نلتقي البارت القادم بأذن الله 👋🏻❤

ـــــــــــــــــــــــــــــــــــــــــــــــــ

#بقلم_الكاتبه_رحاب_القاضي

          الفصل التاسع الجزء الثالث من هنا 

لمتابعة باقي الرواية زوروا قناتنا على التليجرام من هنا  

تعديل المقال